udusimba two mu bwoko bwa Marijoze ntabwo tuzwiho kugira uburozi bwica umuntu cyangwa ubumura ku buryo kakurya ukagira ikibazo. Iyo iguye mu biryo, ntago iciramo cyangwa ngo isukemo ubumara yibitsemo mu mubiri.

Urumva rero ko  abavuga ko ibiryo byaguyemo marijoze biba bihindutse uburozi bwakwica umuntu, mu byukuri nta gihamya ihagije ishingiye ku bushakashatsi bwizewe baba  bafite.

Icyakora, icy’ingenzi si ukumenya niba ubwayo ifite ubumara ahubwo ni ukumenya niba koko hari ubundi buryo yakwanduza ibiryo yaguyemo ku buryo byatera uburwayi.

Marijoze Kimwe n’utundi tunyamaswa two mu bwoko bw’ibikururanda, nk’umuserebanya n’utundi ,  usanga dushobora kwibanira  na zamikorobe zishobora gutera indwara ku bantu, haba ku ruhu, ku maguru cyangwa mu mara yatwo; nyamara izo mikorobe ugasanga two ntacyo zadutwara.

Muri izo mikorobe, iy’ingenzi ni bagiteri yitwa Salmonella, itera indwara yo mu bwoko bwa tifoyide itera kuruka , kugira diarrhea no kubabara mu nda cyane. marijoze ishobora kubana nayo nubwo yo  yaba igaragara nk’aho ari nzima  kandi isa neza.

Iyo marijoze  iguye mu biryo rero;  izo mikorobe ziba ziri ku mubiri wayo, ku maguru cyangwa mu mwanda wayo, zishobora kwanduza ibyo biryo, bikaba byatuma ubiriyeho yandura ya ndwara.

Yego. Umuntu uriye ibiryo byaguyemo marijoze ashobora kwandura ya ndwara iterwa nda Salmonella , maze  mu masaha make , akaba yatangira kuruka, gucibwamo, kubabara mu nda, kugira umuriro, gucika integer, iseseme no kuruka, rimwe na rimwe no kuribwa umutwe.

Wibuke ko iyo mikorobe ishobora no kwandurira mu bundi buryo cyane cyane iyo ibyokurya byateguranywe isuku idahagije, bityo umuntu wese wariye ibyo kurya akagaragaza ibimenyetso nk’ibyo siko byanze bikunze biba byatewe na marijoze cyane cyane iyo nta wayisanzemo cyangwa ngo ayibone igwamo.

Ubu burwayi buterwa na salmonella rero, ku bantu benshi bafite ubuzima bwiza , bakira vuba iyo banyoye amazi ahagije kandi bagahabwa imiti y’ibanze. Ariko hari igihe indwara ishobora gukomera, za mikorobe zigakwira mu maraso ukagira infegisiyo yo mu maraso (septicemia) cyangwa wenda kuruka cyane no gucibwamo bigatuma utakaza amazi menshi (dehydration)

Akenshi abantu baba bafite ibyago byinshi byo kuremba cyane ni abasanzwe bafite ubudahangarwa bw’umubiri budakomeye, nk’abana , abagore batwite, ababana n’ubwandu, cyangwa abafata indi miti ica intege umubiri.

Rimwe na rimwe ubu burwayi buterwa na Salmonella buba bushobora shobora no guhitana umuntu. Ariko ibi ntibisobanura ko marijoze guye mu biryo ishyiramo uburozi bwakwica umuntu ako kanya. Ikindi nk’uko twabibonye iyi salmonella ishobora no guturuka ahandi henshi hatari kuri marijoze.,

Inama nziza kurusha ibindi , ni uko ibyo byaguyemo marijoze “BITAGOMBA KURIBWA”. Niba bayisanzemo, cyangwa yaguyemo mureba, byaba byiza kumena ibi biryo mugateka ibindi.

Gukuramo marijoze, gusa ntibihagije, kuko za mikorobe zishobora kuba zamaze gukwirakwira mu biryo byose.

Icyakora, marijoze iramutse  Niba marijoze yaguyemo ibiryo bikiri ku ziko, ni ukuvuga hamwe biba biri kubira,  ubu bushyuhe bushobora kwica iyi mikorobe ya  Salmonella  kimwe n’uko bwica izindi  bagiteri nyinshi. Ibi byagabanya ibyago byo kwandura ku muntu wabirya n’ubwo n’utabyizera ijana ku rindi.

Kubera ko bidashoboka kumenya kumenya niba mu biryo hagiyemo mikorobe cyangwa zitagiyemo,  kumena ibiryo byaguyemo marijoze, byaba ari umwanzuro mwiza kurusha kubyirengagiza ukabirya

Kubisubiza ku ziko ngo byongere bibire bishobora kudakuraho burundu ibyago byo kwandura.

1.Ntukarye cyangwa ngo ugaburire abandi ibyo biryo.

2. Mena icyo biryo byose ahantu bitakwanduza abandi.

3. Oza neza isafuriya, amasahani n’ibikoresho byakoreshejwe ukoresheje amazi meza n’isabune.

4.Sukura neza ahantu ibiryo cyangwa marijoze byaguye.

5. Karaba intoki ukoresheje amazi n’isabune nyuma yo gukora kuri marijoze cyangwa ku bikoresho byanduye.

6. Rinda abana gukora kuri marijoze

7. Gira akamenyero ko gupfundikira ibiryo umaze guteka, cyane cyane igihe biri guhora cyangwa bitegereje kugaburwa.

Uramuse ubimenya wamaze kurya ibyo biryo, ntibigomba gutuma uhangayika cyane. Nta n’ubwo ari ngombwa gushaka imiti yo kukurutsa uburozi, kunywa amakara cyangwa ngo uhite utangira kunywa imiti nta kibazo wagize.

Birashoboka rwose ko ushobora kurya ibiryo byaguyemo marijoze ntugire icyo uba na gato. Icy’ingenzi ni ugukurikirana mu masaha akurikiraho, kuko uramutse wanduye salmonella, akenshi ibimenyetso byayo bishobora gutangira hagati y’amasaha 6 n’iminsi 6.  Muri icyo gihe utangiye kuruka cyangwa kugira diarrhea , nibwo wakwihutira gutangira imiti , harimo ibuza kuruka, ihagarika diarrhe hamwe na antibiyotike zivura salmonella bamwe bita infegisiyo yo mu mara.

Uramutse ufashwe no kuruka cyangwa gutitwa bikabije , bikanga guhagaraga , cyangwa ugatangira kwituma amaraso, kugira umuriro, kubabara bikabije mu nda,  cyangwa ukagera aho ugira umwuma ukabije cyangwa gutangira kuvuga ibintu biterekeranya. Aho umuntu aba arembye cyane ku buryo atajyanywe kwa muganga ashobora kuhasiga ubuzima. Kwa muganga bamufatira ibipimo byangombwa bakamuha n’imiti yabugenewe wenda bayinyujije mu nshinge no mu maserumu, ikamufasha.

Marijoze ntabwo ubusanwe  ubwayo igira ubumara bwakwica umuntu; Ariko ishobora gukwirakwiza mikorobe yitwa Salmonella n’izindi mikorobe zitera indwara.

Ni yo mpamvu iyo iguye mu biryo, tubifata nk’ibyanduye cyangwa ibishobora gutera indwara , bikaba byaba byiza kutabigaburira uwo ari wese no kubimena mu rwego rwo kwirinda.